Вработените во пиварницата „Правда“ во најголемиот град во западна Украина, Лавов, поради руската инвазија, наместо пиво почнале да произведуваат молотови коктели.
Градот Лавов, кој се наоѓа во близина на границата со Полска, е бастион на украинскиот идентитет, а во моментов неговите жители стравуваат од доаѓањето на руските тенкови.
„Молотовиот коктел е готов кога парталот е добро натопен“, рече еден од вработените во пиварницата, насмевнувајќи се. Турка парче платно во пивско шише исполнето со мешавина од бензин и моторно масло. Истото го прават и двајцата шанкери до него.
Десетици уредно наредени молотови коктели, наместени за да не наврне снег во нив, се подготвени за употреба. Иако овие коктели може да изгледаат залудни во борбата против тенковите и проектилите, сопственикот на пиварницата, Јуриј Заставниј, ја сфатил задачата доста сериозно.
„Го правиме ова затоа што некој мора. Имаме искуство затоа што веќе ја доживеавме уличната револуција од 2014 година“, рече Заставниј, мислејќи на бунтот во Киев со кој беше соборен режимот поддржан од Кремљ.
„И тогаш моравме да произведуваме и користиме молотови коктели“, рече Заставниј. Тој рече дека идејата дошла од неговите вработени кои учествувале во револуцијата во 2014 година. Не е прв пат „Правда“ да прерасне во еден вид институција во Лавов.
Едно од најпознатите пива што ги произведува го носи навредливото име „Путин хуило“ (Путин к***** во глава) и стана познато во светот во 2014 година. Пиварницата започна со производство на коктели за Територијалните одбранбени сили на Украина во саботата, организација на резервисти кои ја прифатија поканата за борба на претседателот Володимир Зеленскиј.
На контролните пунктови околу градот со 720.000 жители, полицијата и војската, кои го контролираат секое возило, веќе се опремени со коктели. Сопственикот на „Правда“ се заколна дека ќе направи „сè што може за да ѝ помогне на Украина да победи во војната“.
