Во заедничка организација на Волонтерскиот Центар Скопје и За Почиста Македонија в недела ќе се организира акција за чистење во Расадник и Домот на културата на која секој може да се приклучи.
„Нашата генерација има неверојатна моќ вистински да влијае и да го направи светот подобро место. Држете ги палците за ведро време, повикате ги пријателите и дојдете! Ние ќе обезбедиме ракавици, вреќи и топол напиток во Домот на културата во Кисела Вода“, информира ВЦС.
Акцијата е по повод 5 декември - Меѓународниот ден на волонтерите, а ќе се вклучи и Општина Кисела Вода.
Сите жители од населбата ќе можат да донираат облека за деца и возрасни, храна со подолг рок, а истите ќе бидат наменети за социјално загрозени семејства во Кисела Вода, како и за децата од Дневниот Центар за деца од улица во Шуто Оризари и во Кисела Вода. Донираната облека и храна да биде соодветно сортирана и спакувана.
Збирното место е во недела (5 декември) во 11 часот во Домот на културата во паркот спроти кулите Расадник. Овој објект со децении за граѓаните од соседството беше повеќе од обична „месна заедница“ или кино-сала. По долгогодишен мрак, Домот заслужува да светне и повторно да биде собиралиште на идеи и на позитивна енергија.
