Арсен Венгер, легендарниот тренер на Арсенал, како проштален подарок од клубот го доби трофејот кој клубот го освои во сезоната на „Непобедливите“.
„Непобедливите“, беа токму играчите на Арсенал под водство на Венгер во сезоната од 2003/04, кога во Премиер лигата ја освоија титулата на Островот без ниту еден единствен пораз во текот на целата сезона.
Арсен вчера за последен пат излезе на „Емирати“ како тренер на „Топџиите“ и се збогуваше од навивачите, а како награда за својата работа и труд го доби највредниот трофеј - златен пехар специјално направен кој засекогаш ќе биде знак за таа непобедлива сезона.
Арсен Венгер е единствениот тренер во историјата на Премиер лигата на кој му успеало такво нешто.
Францускиот експерт неодамна објави дека ќе се повлече од местото менаџер на „Топџиите“, после 22 години поминати на чело на клубот.
Кој ќе го наследи Венгер се уште е непознато, медиумите се обидуваа да погодат, но името на неговиот наследник останува енигма.
Од друга страна, Арсен планира да направи мала пауза и потоа веројатно да продолжи да ја врши истата функција во друг клуб.