Ракот на кожата е малигнен тумор кој произлегува од меланоцитите. За жал, во последните неколку децении, бројот на заболени од оваа форма на рак е значително зголемен во светот.
Лекарите и метеоролозите со години предупредуваат на употреба на заштитни средства и носење лесна облека што го покрива телото, како и избегнување на силното сонце, но често забораваат да спомнат дека постои уште една форма на заштита од рак на кожата, а тоа е исхраната.
„Истражувањето е ограничено, но ветува. Заедно со ограничувањето на изложувањето на сонце, јадењето одредени видови храна може да помогне да се намали ризикот“, вели диететичарот Карен Колинс, советник за исхрана во Американскиот институт за истражување на ракот.
Шарено овошје и зеленчук
Лекарите и нутриционистите препорачуваат да јадете пет или повеќе порции овошје и зеленчук секој ден, но погрижете се да изберете доволно темнозелени и портокалови зеленчуци и овошки. Секоја недела јадете најмалку три порции брокула или кељ и уште четири до шест порции темнозелен лиснат зеленчук, како што се спанаќ и кељ. Што се однесува до овошјето, треба да јадете седум порции агруми, за кои една италијанска студија покажа дека штити од рак на кожата кога се консумира во големи количини.
„Оваа храна содржи моќни антиоксиданси, вклучувајќи полифеноли, каротеноиди и други биоактивни супстанции, кои може да го намалат ризикот од меланом“, вели авторката на студијата Кристина Фортес, истражувач на клиничка епидемиологија во Istituto Dermopatico dell'Immacolata во Рим.
Риба богата со омега-3 масни киселини
Благодарение на антиинфламаторните ефекти на омега-3, кои се наоѓаат во школките и масните риби, консумирањето барем една порција неделно од таква храна може да ја удвои вашата заштита од меланом, покажа истражувањето на Фортес. Таа додава дека таквата диета може да заштити и од немеланомски рак на кожата, кои се помалку смртоносни, но почести.
Австралиските истражувачи откриле дека луѓето кои јаделе во просек една порција масна риба богата со омега-3 масни киселини, како што се лосос, сардина и скуша, на секои пет дена развивале 28 отсто помалку актинични кератози, груби, лушпести преканцерозни дамки или израстоци на кожата кои се предизвикани од изложување на УВ зрачење и може да се претвори во рана форма на рак, според студијата објавена во 2009 година во американскиот весник за клиничка исхрана.
Зачински билки
Додавањето зачински билки во вашата салата, супа, пилешко, риба или било што друго што сакате да јадете не само што ја прави вашата храна повкусна туку и помага да ја зајакнете вашата кожа. Билките може да содржат антиоксиданси, една лажица може да има колку парче овошје и може да заштити од меланом. Свежиот рузмарин, магдоносот и босилекот имаат најголеми придобивки.
Чај
Заменете го кафето со шолја чај и намалете го ризикот од рак. Лабораториските истражувања покажаа дека полифенолните антиоксиданси во зелениот и црниот чај ги инхибираат протеините потребни за развој на рак на кожата.
„Тие исто така можат да го изгладнуваат ракот со ограничување на растот на крвните садови околу туморот“, вели коавторот на студијата д-р Зиганг Донг.
Истражувањето на Кристина Фортес наведува дека пиењето шолја чај дневно е поврзано со помала инциденца на меланом. Истражувачите од Медицинскиот факултет Дартмут откриле дека луѓето кои пијат две или повеќе шолји дневно имаат значително помали шанси да добијат рак од оние кои не пијат чај.
Црвено вино
Сигурно веќе сте слушнале дека црвеното вино може да биде ефикасно во борбата против ракот. Во истражувањето спроведено од Фортес и нејзините соработници, не се откриени ниту заштитни, ниту штетни ефекти врз меланомот.
Меѓутоа, во една австралиска студија, луѓето кои пиеле една чаша вино (црвено, бело или пенливо) секој ден го намалиле ризикот од развој на преканцерозни дамки или израстоци на кожата за 27 проценти.
