ВМРО-ДПМНЕ повторно го повика лидерот на СДСМ Зоран Заев да ја отфрли Тиранската Платформа. Во соопштението објавено денес, партијата го повикува Заев „да собере храброст и да се огради од Тиранската Платформа“.
Според ВМРО-ДПМНЕ, Питер Ванхауте ги открил намерите да отвори дебата за федерализација на Република Македонија.
„За оваа скандалозна изјава на Питер Ванхауте, криминогениот СДСМ молчи, како што молчи и за шокантните изјави на албанската пратеничка Месила Дота, која директно се закани на аболицираниот Зоран Заев дека ако тој отстапи од платформата, тогаш сите Албанци ќе се ангажираат околу остварување на сонот за Илирида“, додаваат од ВМРО-ДПМНЕ.
Од партијата исто така се изјаснија и во врска со Специјалното јавно обвинителство, за кое велат дека „нема рационална причина да продолжи неговиот мандат“.
„ВМРО-ДПМНЕ гласаше за СЈО кое професионално, непристрасно и неселективно ќе си ја врши работата. ВМРО-ДПМНЕ не гласаше за СЈО што ќе биде прв соработник и послушник на аболицирани криминалци и ќе служи како општинска организација на криминогеното раководство на СДСМ“, порачуваат од партијата.
„ВМРО-ДПМНЕ не гласаше за СЈО кое ќе заплашува и затвoра медиуми. ВМРО-ДПМНЕ не гласаше за СЈО кое ќе вработува роднини и партиски членови на СДСМ и ќе ангажира функционери и поданици на аболицираниот криминалец Заев како експерти“, додаваат од ВМРО-ДПМНЕ.
„Со самото откажување од случајот „Пуч“, со пуштањето од притвор на Верушевски и со сегашниот атак кон медиумите, СЈО потврди дека нема ниту една рационална причина за продолжување на неговиот мандат“, потенцираат од ВМРО-ДПМНЕ.
