Јужнокорејски танкер се преврте рано утринава кај остров во Југозападна Јапонија, а крајбрежната стража соопшти дека спасила четворица членови на екипажот и сѐ уште трага по седум исчезнати.
Крајбрежната стража соопшти дека добила повик за помош од танкерот за хемикалии „Keoyoung Sun“. Во повикот се вели дека тој се превртел додека барал засолниште во близина на јапонскиот остров Муцура поради лошите временски услови.
Островот се наоѓа веднаш до југозападниот крај на главниот јапонски остров Хоншу, на околу 1.000 километри од Токио. Бродот подоцна целосно се превртел, соопшти крајбрежната стража. Снимките на телевизијата NHK покажаа дека бродот целосно се превртел. Не е позната состојбата на спасените членови на екипажот.
Телевизијата NHK објави дека во екипажот имало Кинез, двајца Јужнокорејци и осум Индонезијци. Засега не се познати други детали, вклучително и како се превртел бродот.
