Ако возите само 20 км/час над дозволеното, тоа ќе ве чини дури 585 евра во северна Европа.
Првиот од низата примери доаѓа од Норвешка, каде брзото возење е строго казнувано. На пример, ќе платите 215 евра за истиот прекршок во Шведска, а 200 евра во Финска, додека сумата ќе се намали како се движите кон југ.
Има големи разлики, па Италијанците ќе ве „олеснат“ за 175 евра, додека германската полиција ќе ви наплати „само“ 60 евра, истакнува германскиот ADAC.
Кога станува збор за непрописно паркирање, повторно е поопасно на северот на Европа. Во Италија ќе платите 45 евра, во Австрија уште помалку - 20 евра, а во Полска дури 110 евра. Најмалку ќе платите во Германија - само околу 10 евра.
Без разлика на висината на казната, алкохолот и возењето не одат заедно. Опасноста е голема, а во случај да ве фатат казните се многу ригорозни. Така во Италија со 1,5 промили може да останете без кола, а истото ве чека во Данска ако заглавите со најмалку 2 промили. Доволно е 1,0 промили во крвта за да завршите еден месец во затвор во Шведска, додека шпанската сообраќајна полиција може да ве затвори до три месеци за 1,2 промили.
Конечно, тука е и многу опасното користење на телефонот додека возите. Норвежаните повторно се издвојуваат со казна од дури 850 евра, додека Холанѓаните ќе ве санкционираат со значителни 380 евра. Шпанската полиција за овој прекршок ги казнува возачите со 200 евра, италијанската полиција со 165, а во Германија казната е 100 евра.