Омикрон, новата загрижувачка варијанта на коронавирусот, пристигна во Европа и првпат беше пријавена до Светската здравствена организација (СЗО) од Јужноафриканската Република на 24 ноември.
Прелиминарните докази сугерираат дека оваа варијанта има зголемен ризик од повторна инфекција и може да се шири побрзо од другите, но се чини дека не предизвикува сериозни симптоми. Она што загрижува е големиот број мутации на овој сој, поради што не може со сигурност да се знае како некои од нив ќе реагираат.
Поради таа неизвесност, европските земји итно реагираа и веднаш ги затворија воздушните граници додека научниците во меѓувреме не дознаат повеќе информации за новата варијанта.
Новиот вид е потврден во Боцвана, Зимбабве, Кина и Израел, додека Белгија е првата европска земја која има ваков тип на вирус. Освен во Белгија, неколку случаи се пријавени и во Италија, Германија, Обединетото Кралство и Чешка.
Германија ги потврди првите два случаи на инфекција со омикрон кај две лица во Минхен, објави баварскиот министер за здравство. Двајцата пристигнале со авион од Јужна Африка на 24 ноември.
Првиот случај на новата варијанта омикрон во Италија е регистриран кај маж кој се вратил од Мозамбик во областа Неапол, соопшти вчера Високиот здравствен институт (ISS).
Регионалната болница во северна Бохемија вчера соопшти дека детектиран е случај на омикрон варијантата кај пациент позитивен на COVID-19.
Во земјите од регионот сè уште не е откриен случај на овој нов сој на коронавирус, а континуирано се врши мониторинг и анализа.
