Римски гробишта стари 2.000 години, во чиј склоп има најмалку 20 гробови, се откриени во близина на северот на Појасот Газа, станува збор за најважно локално откритие во изминатата деценија.
Газа е богата со антиквитети, бидејќи била важна трговска точка во бројни цивилизации, од старите Египќани и Филистинците опишани во Библијата, па низ Римското царство и крстоносните војни.
Меѓу урнатини откриени на таа територија се наоѓаат и оние од времето на Александар Македонски и инвазијата на Монголите.
Досега се откриени 20 римски гробови и се очекува вкупно да се лоцираат 80 гробови на површина од 50 метри квадратни. Отворени се два гроба, во едниот имало посмртни останки, а во другиот глинени предмети.
„Поради обликот на гробовите и релативно орнаментираните декорации, тие веројатно припаѓаат на високо рангирани луѓе во Римското царство, од првиот век“, соопшти Џамал Аби Рида Министерството за туризам и антиквитети во Газа.
За Разлика од муслиманските гробови од подоцнежните периоди, свртени кон север или југ, римските гробови се свртени кон исток или запад.
„Имавме неколку откритија во минатото, но ова е најважното археолошко откритие во последните 10 години“, истакна Абу Рида.
Тоа подрачје е затворено за новинари и јавноста додека локацијата не се организира и обезбеди за посетители. Гробовите биле пронајдени од градежни работници кои работеле на проект за изградба на станбени згради, со помош на египетско финансирање.
Кога работниците наишле на големи дрвени цигли од гробовите, веднаш престанале со работа и ги повикале археолозите, пренесе Reuters.