Полицијата во Куманово рано утрово во возило со штипски регистарски ознаки пронашле 21 мигрант, од кои 10 биле малолетници. Штипјанецот кој управувал со возилото е приведен.
Од МВР денеска информираа дека околу 1:00 часот во кумановското село Матејче, полициски службеници од Полициското одделение Матејче дале знак да застане патничко моторно возило Renault Espace со штипски регистарски ознаки, но истото продожило да се движи кон село Отља.
– По кратко време на ул. „11-ти Ноември“ во Куманово, од полициски службеници од СВР Куманово возилото било сопрено, при што било констатирано дека е управувано од Д.Ј. (70) од Штип. Во возилото се превезувале 21 мигрант и тоа од Сирија, Авганистан, Пакистан и Бангладеш, од кои 10 малолетни лица, се наведува во соопштението од МВР.
Извршен бил увид на местото на настанот од увидна екипа од СВР Куманово. Д.Ј. бил приведен во полициска станица за понатамошна постапка, а мигрантите биле сместени во Транзитениот центар Табановце. Се преземаат мерки за расчистување на случајот.
