Два ултра лесни воени авиони U-208 што припаѓале на 60º Stormo на италијанското воено воздухопловство се судрија денеска, нешто пред 12 часот во близина на Рим.
Еден од авионите паднал во поле во близина на градчето Гвидонија Монтечелио, додека другиот се урнал на улица меѓу куќи во ова градче на периферијата на Рим, меѓу улиците „Рома“ и „Деле Маргерите“. Двајцата пилоти загинаа, пренесува Il Corriere della Sera.
– Пилотот направил нешто за да ги избегне зградите, и ги избегна. Според моето мислење тој маневар нè спаси, затоа што можел да се удри во зградите, рече градоначалникот на Гвидонија, Мауро Ломбардо.
Реонот на несреќата е ограден од спасувачи кои проверуваат дали во несреќата загинале и други лица. Во тек е полициска истрага.
Според неофицијални информации, четири авиони полетале од воениот аеродром „Гвидонија“ на тренинг лет над блиското село, а не е јасно како завршиле на небото над градот.
Останатите двајца пилоти слетале безбедно и ќе бидат сослушани во следните неколку часа.
– Во име на Владата го изразувам моето најдлабоко сочувство до семејствата, нивните колеги и целиот корпус на воздухопловните сили, изјави италијанската премиерка Џорџа Мелони по падот на авионите.
– Длабоко сум потресен откако ја дознав страшната вест за смртта на двајцата пилоти. Изразувам најдлабоко сочувство до семејствата и челниците на воздухопловните сили, рече претседателот на Сенатот, Ињацио Ла Руса.
Загинаа потполковникот Џузепе Чиприано и мајорот Марко Менегело.