Војната на Кавказ за територијата Нагорно-Карабах меѓу Ерменија и Азербејџан влезе во 16-тиот ден.
Азербејџанскиот претседател Илхам Алиев денеска изјави дека Турција мора да учествува во мировните преговори меѓу Азербејџан и Ерменија за спорот во Нагорно-Карабах, додавајќи дека сѐ уште не знае кога тие ќе почнат.
Азербејџанските и ерменските сили денеска повторно меѓусебно се обвинуваа за прекршување на примирјето, наведувајќи дека другата страна извршила нови напади во Нагорно-Карабах и околните области.
„Турција е голема сила, што се виде кога учествуваше во смирувањето на тензиите во Сирија, Либија и другите меѓународни конфликти. Затоа, исто така, тие мора да учествуваат и во овој процес“, рече Алиев.
Тој додаде дека Турција е исто така дел од групата Минск.
„Тогаш, зошто тие не учествуваа во разговорите? Знам дека многу западни земји не сакаат да ја гледаат Турција на преговарачката маса, но зборот на Турција е голем и независен“, рече азербејџанскиот претседател.
