Берзанските индекси на Волстрит благо пораснаа во понеделникот, благодарение на растот на цените на акциите на Tesla и на неколку банки, додека прометот беше скромен поради скратеното тргување во пресрет на празникот. Dow Jones зајакна за 0,03 отсто, на 34.418 поени, додека S&P 500 порасна за 0,12 отсто, на 4.455 поени, а индексот Nasdaq за 0,21 отсто, на 13.816 поени.
Меѓу најголемите добитници вчера беа акциите на Tesla, со скок на цената од речиси 7 отсто, откако производителот на електрични автомобили објави рекордна продажба на возила во вториот квартал. S&P индексот на банкарскиот сектор, пак, порасна за 1,5 отсто бидејќи некои банки најавија повисоки дивиденди, откако неодамна го поминаа вообичаениот годишен стрес тест.
Обемот на тргување беше скромен бидејќи работата беше скратена во пресрет на празникот Денот на независноста на САД. Од почетокот на годината, Dow Jones порасна за 3,8 отсто, додека S&P 500 скокна за речиси 16 отсто, а Nasdaq повеќе од 31 отсто, најмногу благодарение на надежите на инвеститорите дека американската централна банка наскоро ќе стави крај на циклусот на зголемување на каматните стапки.
Сепак, се поставува прашањето дали овој пораст на индексот е оправдан со оглед на тоа што растот на економиите забавува, што ќе ја притисне заработката на компаниите, додека централните банки сигнализираат натамошно зголемување на каматните стапки во наредните месеци бидејќи инфлацијата е сè уште се движи далеку над целните нивоа.
И на европските берзи цените на акциите вчера благо паднаа. Лондонски FTSE индексот ослабе за 0,06 отсто, на 7.527 поени, додека франкфуртски DAX се лизна за 0,41 отсто, на 16.081 поен, а париски CAC 0,18 отсто, на 7.386 поени.
