Шведскиот производител претстави поевтина верзија на кросоверот C40 со еден електричен мотор и рестилизираниот електричен SUV XC40 Recharge.
Volvo го збогати електричниот модел C40 Recharge со попристапна варијанта придвижувана од еден мотор. Овој новитет е дел од серијата ажурирања на целата линија на електрични модели, која вклучува „фејслифт“ за теренецот XC40 Recharge.
Новата верзија на C40 Recharge ќе биде основната опција на овој автомобил, а се потпира на еден електричен мотор кој ги движи предните тркала.
Volvo не објави податоци за перформансите, но вели дека неговата батерија од 69 kWh ќе обезбеди C40 Recharge да оди незапирливо до 434 km, според тест циклусот WLTP. Потребни се 32 минути на брз полнач за полнење од 10 до 80 проценти од батеријата.
Сродниот SUV XC40 Recharge е заснован на истата платформа и веќе нуди единствена опција за мотор. Но, и овој модел е подобрен, пред сè во поглед на дизајнот.
Автомобилот доби нова предна решетка без рамка, ревидирана LED светилка „Thor's hammer“ со адаптивна технологија и нов браник што во стилот ќе го доближи до C40.
Volvo додаде и премиум опција за тапацир без кожа, како и нови бои на каросеријата, а освежен е и дизајнот на тркалата од лесна легура.
Двата модела на пазарот ќе пристигнат кон крајот на оваа година, до кога треба да дознаеме повеќе технички детали и цени.