На денешен ден во Битола беше постигнат првиот гол во првата сезона на најдобрата македонска фудбалска лига по независноста.
Многу рано, уште во 4. минута од натпреварот помеѓу Пелистер и Рудар од Пробиштип пред двеилјадна публика на стадионот „Под Тумбе Кафе“ во Битола, Бруно Пресилски го постигнал првиот гол во новата 1.МФЛ на независна Македонија.
Откако една година претходно, на 8 септември 1991, Македонија прогласи независност и отцепување од Југославија, македонските клубови сезоната 1991/1992 ја доиграа во југословенските лиги. Во меѓувреме се кроеше фудбалскиот пирамидален систем за во август 1992 да почне лигашката авантура на независна Македонија - сезона 1992/1993.
На денешен ден, 23 август, во 1992 година се играа натпреварите од 1. коло на новата Прва македонска фудбалска лига, а беа постигнати следниве резултати:
Вардарски (Богданци) - Слога Југомагнат (Скопје) 0:0
Борец (Велес) - Тиквеш (Кавадарци) 2:2
Македонија (Скопје) - Беласица (Струмица) 0:0
Пелистер (Битола) - Рудар (Пробиштип) 5:0
Победа (Прилеп) - Вардар (Скопје) 1:1
Металург (Скопје) - Силекс (Кратово) 2:0
Саса (Македонска Каменица) - ФЦУ (Скопје) 2:1
Осогово (Кочани) - Тетекс (Тетово) 3:0
Балкан (Скопје) - Брегалница (Штип) 2:1
Како што се гледа, тогаш се натпреварувале дури 18 клубови, за разлика од денес кога има 12. На крајот шампион станал Вардар, со 21 бод пред Силекс и Балкан, а од лигата испаднале Металург, Брегалница, Тетекс и Вардарски. Тогаш за победа се добивале по 2 бода.
На деветте натпревари биле постигнати 22 гола, што во просек е малку над два гола по натпревар, или поточно 2,44. Честа да биде запишан во историјата како стрелец на првиот гол во 1.МФЛ ја добил младиот 19-годишен Бруно Пресилски, напаѓач на битолски Пелистер, кој во 4. минута со удар од дваесетина метри, не толку силен - како што еднаш изјави - ја затресол мрежата на гостите од Пробиштип. Според извештајот објавен во Нова Македонија, сликан од MacedonianFootball.com, голот паднал „со помош на голманот Папаров, кој што прво ја фати топката, потоа ја испушти и таа отседна во неговата мрежа“.
За жал видео од тој историски гол нема на интернет. Можеби постои некаде во архивата на МРТ, која тогаш вршела преноси и правела преглед на колото со хајлајтс од натпреварите. Можеби има снимка и Пелистер, можеби и ФФМ, па се надеваме некогаш ќе се одлучат да пребараат по своите архиви и јавно да го објават голот на Пресилски за да остане и како видео спомен за наредните поколенија.
