Јутјуберот Скопски Фанданго објави 16-минутна снимка од прошетка со автомобил низ населбите од она што е денеска населби во Општина Аеродром, снимено во 1985 година.
Скопје, СР Македонија, Југославија, 1985 година. Веќе доста згради се никнати во населбите Јане Сандански и Аеродром, но и натаму наголемо се гради. Денешните крошни дрвја се само мали, штотуку насадени. Купишта земја се забележува - Аеродром допрва ќе стане голема населба.
Снимателот тргнува од населбата Јане Сандански, вози по истоимениот булевар минувајќи покрај она што денеска е Капитол Мол, а тогаш само празен простор. Продолжува право, па врти по ул. „Васко Карангелески“ кон населбата Аеродром, за некои денес позната како Стар Аеродром, кај поликлиниката „Јане Сандански“. Пазарот на кој застанува е веројатно зад она што денеска е Бисер, каде и денес има пазар.
Потоа се сели во Мичурин, онаков каков што денес младите не го паметат. Градежната мафија сѐ уште не ги допрела двокатните згради во оваа стара скопска населба.
Видеото завршува така што снимателот оди покрај кулите во Аеродром, најпрепознатливите згради во оваа населба пред да биде силувана од бетонизацијата на секој можен градоначалник на Град Скопје, Општина Кисела Вода* и Општина Аеродром.
*До 2005 година целата територија на денешната Општина Аеродром беше под Општина Кисела Вода.
