HBO ја најавува ексклузивната премиера на првите две епизоди на новата серија „The Young Pope“ („Младиот папа“), во копродукција на HBO, Sky и Canal +, која на ќе биде емитувана HBO каналот во петок, 28 октомври во 20 часот.
„The Young Pope“ („Младиот папа“) ја раскажува контроверзната приказна за почетокот на понтификатот на Пиј XIII, роден како Лени Белардо. Изборот на овој млад и шармантен Папа најверојатно е резултат на ефикасната медиумска стратегија од страна на Колегиумот на кардинали. Но, изгледот може да лаже. Особено во место и меѓу луѓе кои одбрале да живеат по волјата Божја. Тоа место е Ватикан, а тие луѓе се водачи на Црквата.
Првиот американски папа, Пиј XIII е човек со голема моќ, кој е тврдоглаво отпорен спрема ватиканските додворувачи и воопшто незасегнат од импликациите кон неговиот авторитет затоа што и самиот тој е најтаинственот и најконтрадикторниот од сите нив. Тој претставува комплексен и конфликтен лик, кој во своите животни избори бил премногу конзервативен, а сепак полн со сочувство за послабите и сиромашните. Мудар и наивен, ироничен и педантен, сомничав и одлучен, меланхоличен и немилосрден, Пиј XIII се обидува да ја премине бескрајната река на човечката осаменост за да го пронајде Бог кој може да го подари на човештвото. Но, и на самиот себе.
Серијата, која беше претставена на Филмскиот фестивал во Венеција, е во режија на Италијанецот Паоло Сорентино, добитник на Оскар за филмот „Големата убавина“. „The Young Pope“ има десет епизоди, а во главната улога ќе го гледаме Џуд Ло, а во останатите Дајен Китон, Сесил Де Франс, Силвио Орландо и други.
Секој петок во 20 часот ќе се прикажуваат по две нови епизоди, а серијата ќе биде достапна и преку услугата на видео на барање HBO On Demand. Првата епизода на „The Young Pope“ ќе биде достапна бесплатно преку услугата HBO GO.
