ФИФА му наложи на Лидс Јунајтед да му плати 28 милиони евра на францускиот фудбалер Жан-Кевин Огустин.
Огустин пристигна на позајмица од Лајпциг во јануари 2020 година. Лидс потоа вети дека ќе го откупи неговиот договор доколку се врати во Премиер лигата.
Лидс влезе во најсилната англиска лига, но не го откупи договорот. Пред две години Лајпциг го тужеше англискиот клуб и со пресуда на ФИФА доби околу 20 милиони евра.
Проблемите на Лидс не завршија тука, бидејќи самиот играч го тужеше клубот. Огустин побара од ФИФА Лидс да му го исплати целосниот петгодишен договор што требаше да го потпише летото 2020 година. Сега светската фудбалска федерација пресуди во негова корист, а Лидс ја обжали оваа пресуда до Судот за спортска арбитража.
Огустин одигра само 3 натпревари за Лидс и собра вкупно 48 минути. Кариерата ја започна во ПСЖ од каде во 2017 година замина во Лајпциг. Од минатата година е во швајцарски Базел.