Баварскиот гигант добро заработува, но вечниот шампион на Германија се посрамоти кога станува збор за платите на неговите вработени во својот тренинг центар. Доби казна поради непочитување на регулативите за минимална плата во периодот 2016-2021 година.
Бидејќи локалните даночни власти непобитно ја докажаа споменатата неправилност, колосот од Минхен е должен да плати казна од 200.000 евра, плус 45.000 во истата валута поради кривични казни и социјални придонеси.
„Клубот соработуваше со нас, постапката е затворена. Случајот за нас е завршен“, објави портпаролот на локалната даночна управа, Томас Мајстер, а се огласи и санкционираниот клуб.
„Баерн никогаш немаше намера да им ја одземе одобрената плата на своите работници. Една година пред почетокот на постапката, во 2020 година, презедовме структурни мерки, за во иднина да избегнеме плати под пропишаниот минимум“, се вели во соопштението на Баварците, кои оваа пролет беа во центарот на вниманието и поради непримерната разделба со двајца негови директори и поранешни играчи, Оливер Кан и Хасан Салихамиџиќ.
