Возачите кои нема да тргнат за три секунди откако ќе се вклучи зеленото светло на семафорот ги нервираат оние што чекаат зад нив, покажаа резултатите од едно најново истражување.
Истражувањето на Британската организација за помош на пат (RAC) спроведено на 2.498 возачи во ОК покажува дека 46 отсто од возачите веруваат дека не треба да поминат повеќе од три секунди откако ќе се вклучи зеелното светло за да почнат да се движат.
Поради тоа RAC изрази загриженост за безбедноста во сообраќајот, сообраќајниот метеж и загадувањето на воздухот предизвикано од возачите кои реагираат премногу бавно.
Околу 17 отсто од испитаниците рекле дека често не успеваат да поминат на зелено светло поради возачите пред нив кои не реагираат навремено. Околу три четвртини (64 проценти) велат дека морале да чекаат повеќе од 10 секунди „на зелено“.
Мажите повеќе ги нервира бавноста отколку жените
Докажано е дека бавноста во движењето повеќе ги иритира мажите отколку жените (50 отсто во споредба со 41 отсто).
Околу една третина (35 проценти) од испитаниците рекле дека можат да се справат ако некому му требаат помеѓу четири и шест секунди, а седум проценти од испитаниците биле многу опуштени во врска со тоа и рекле дека можат да чекаат онолку долго колку што треба.
Портпаролот на RAC, Сајмон Вилијамс, рече дека повеќе од три секунди „може да изгледаат како вечност кога се обидувате да поминете на семафор“, особено затоа што за некои зеленото светло трае само 15 секунди.
„Чекањето сериозно го намалува бројот на возила што можат да поминат пред да се запали црвеното светло, што создава сообраќаен метеж и може да го зголеми загадувањето на воздухот“, додаде тој.
„Премногу возачи поради некоја причина не обрнуваат доволно внимание на она што се случува околу нив кога чекаат ред на семафор“, рече Вилијамс.
Освен што го продолжува времето на возење, ова може да влијае и на безбедноста во сообраќајот, особено кога возачите нагло тргнуваат бидејќи доцна забележуваат промена на светлото, па не ги ни проверуваат ретровизорите за да се уверат дека можат да тргнат. Повеќе возачи би требало да внимаваат на семафорите, наместо да лутаат со мислите или да чепкаат во телефонот, што патем е и нелегално.
