Напаѓачот на клубот од Милано не игра за својот тим веќе некое време бидејќи е повреден, но ќе се јави на повикот на шведскиот селектор за претстојните мундијалски квалификации.
Навивачите на Милан со право се бесни: Златан Ибрахимовиќ е повреден за нивниот тим, но ќе проба да стисне заби за да ѝ помогне на Шведска да се квалификува на Мундијалот во Катар.
Шведскиот селектор Јане Андерсон го вклучи Ибра на списокот од 25 фудбалери кои треба да му бидат на располагање за претстојните два натпревара, против Косово на 9 октомври и три дена подоцна против Грција.
По неколкугодишното неиграње за татковината, Ибра во март се врати во жолто-синиот дрес, а потоа поради повреда на коленото го пропушти ЕУРО 2020. Повредата го мачеше до септември кога само што се врати во дресот на Милан, одигра само 30 минути против Лацио, даде и гол, но повторно се повреди, овој пат Ахиловата тетива поради која сѐ уште е во аут.
Селекторот Андерсон се надева дека Ибра ќе се опорави до овие два дуела, но дури и да не може да игра тој го објасни неговиот повик:
„Одлучив да го повикам бидејќи верувам и очекувам дека би можел да биде корисен и да му помогне на тимот. Го мачи повреда, но ден по ден се подобрува. Ќе биде со нас кога ќе се собереме наредната недела“, рече шведскиот стратег.
Ибрахимовиќ и завчера не беше ниту на клупата кај Милан на натпреварот од Лигата на шампионите против Атлетико. Пред репрезентативната пауза „Росонерите“ имаат уште еден натпревар викендов против Аталанта в недела вечер. Дали Ибра ќе биде во комбинација за ова тешко гостување, или ќе се оправи само за Шведска, останува да видиме.