Со автобуси и багери пред себе, поголема група граѓани предводена од Граѓанската иницијатива „За заедничка Македонија“, со знамиња и транспаренти по 39-ти пат попладнево одржаа мирен протест.
Групата граѓани се движеше од Владата, каде што традиционално го започнуваат протестот, кратко се задржаа пред Канцеларијата на претседателот Иванов и завршија пред републичкото Собрание.
Таму, организаторите на протестот порачаа дека денеска бил направен „шверцерски“ обид да се избере претседател на Собранието, но обидот не успеал и нема да успее.
На пратениците од опозицијата им беше порачано дека „не смеат да си играат народ“ и нема да им биде дозволено Република Македонија, од мултиетничка, да ја претворат во бинационална држава.
Протестите завршија со заедничко пеење на македонската химна и најава за повторно собирање за утре, од 17 часот.
