Во раните утрински часови, во 4 часот и 6 минути, Црна Гора ја погоди земјотрес со јачина од 5,4 степени според Рихтеровата скала, соопшти Црногорскиот завод за хидрометеорологија и сеизмологија.
Оттаму изјавија дека ова одговара на епицентрален интензитет од степен VII на Меркалиевата скала. Земјотресот бил почувствуван и низ цела Хрватска и Босна и Херцеговина.
Според првите информации, епицентарот бил веднаш до границата на Црна Гора и БиХ, недалеку од Гак, на 28 километри од Никшиќ. Сеизмолошката служба на Хрватска соопшти дека нивните сеизмографи забележале силен земјотрес со јачина од 5,6 степени според Рихтеровата скала на 56 километри североисточно од Дубровник.
Проценетата длабочина на земјотресот е околу 14 километри. Засега нема информации за повредени или за материјална штета.
Црногорскиот институт за хидрометеорологија и сеизмологија наведува дека земјотресот можел да предизвика материјална штета во подрачјето на епицентарот.
Црногорскиот сеизмолог Срѓан Цековиќ за РТЦГ потврди дека имале многу повици од граѓани кои биле вознемирени. Тој додаде дека е добро што епицентарот е во ненаселено место.
„Најсилно се почувствува околу Билеќа со интензитет од шест степени“, нагласи тој.
Недолго по првиот потрес, во 4 часот и 14 минути се случи нов земјотрес со малку послаб интензитет од 3,1 степени според Рихтеровата скала, но овој пат на босанската страна на границата. Во 4 часот и 30 минути следеше уште еден земјотрес со ист интензитет на територијата на Црна Гора.