Земјотрес со интензитет од 5,7 степени според Рихтеровата скала, кој ноќеска ја погоди Босна и Херцеговина, беше почувствуван и во земјава, поточно во Скопје, Гостивар и Тетово.
Како што соопшти Сеизмолошка опсерваторија при Природно-математичкиот факултет во Скопје земјотресот се случил синоќа во 23 часот и 7 минути со Рихтерова локална магнитуда ML5.7. Бил почувствуван од граѓаните во Скопје, Гостивар, Тетово и околината со интензитет од 3 степени според Европската макросеизмичка скала.
– Телеметриската сеизмолошка мрежа на Република Северна Македонија, со станици во Скопје, Валандово, Охрид, Штип и Пехчево, одржувана од Сеизмолошката опсерваторија при Природно-математичкиот факултет во Скопје, синоќа на 22.04.2022 година регистрираше земјотрес 296 km северозападно од Скопје, кој потекнува од територијата на Република Босна и Херцеговина, 42 километри југоисточно од градот Мостар, се наведува во соопштението на Сеизмолошката опсерваторија, објавено кусо пред полноќ.
Земјотресот со интензитет од 5,7 степени според Рихтеровата скала е почуствуван во поголемиот дел на Босна и Херцеговина и Далмација, се наведува во првичниот извештај на Евромедитеранскиот сеизмолошки цент.
Епицентарот на земјотресот бил на 15 километри источно од Столац, во источниот дел на Херцеговина, на длабочина од 5 километри, се наведува во извештајот, јавува HINA.
Земјотресот, според податоците на ЕМСЦ, е почувствуван и во Северна Македонија, Албанија, Косово, Италија и Словенија.
ЕМСЦ предупредува дека се можни вторични потреси во наредните часови или денови.
– Освен доколку е неопходно држете се подалеку од оштетените подрачја заради ваша безбедност. Бидете внимателни и следете ги информациите на државните власти, се наведува во предупредувањето на ЕМСЦ.
