Хрватска и Австрија бележат зголемен број на луѓе заразени со новиот коронавирус откако претходно состојба се стабилизираше.
Бројот на заразени со коронавирусот во Хрватска расте во последните четири дена, а денеска има 17 новозаразени. Хрватскиот портал Index потсетува дека во четвртокот имало 11, во петокот 12, а вчера 18 нови случаи на коронавирусот.
Националниот штаб за цивилна заштита најави дека денеска ќе одржи прес-конференција, по подолго време, по повод зголемувањето на бројот на заразени лица.
Во меѓувреме, министерот за здравство, Вили Берош на својот Twitter профил објави дека „ситуацијата е под контрола, но ништо не е поважно од здравјето на нацијата“.
Во последните 24 часа во Австрија се регистрирани 18 нови случаи на заразени со коронавирусот, а за првпат во последните неколку недели, во Виена нема нови случаи. Повеќето од новите случаи, 7, се регистрирани во Долна Австрија.
Во текот на изминатите 24 часа, бројот на смртни случаи се зголеми за два на вкупно 690 починати лица.
Вкупно, од почетокот на епидемијата на крајот на февруари, со коронавирусот се заразиле 17.248 австриски државјани, а излекувани се 16.119.
Во однос на тестирањето, во последните 24 часа биле тестирани само 2.376 луѓе, што е за над 3.700 помалку од претходниот ден.
