Мерелиз Ван Дер Мерв, 32-годишна жена од Јужна Африка, овие денови на социјалните мрежи објави фотографии на кои позира со мртва жирафа убиена во текот на лов и тоа на Денот на вљубените.
Како подарок од сопругот за денот посветен на љубовта оваа жена побара да убие 17-годишна жирафа, за да го извади нејзиното срце и да се фотографира со мртвото животно. И тоа не е сè, таа има и оправдување за ова откако нејзините постапки наидоа на осуда на интернет.
„Дали некогаш сте се запрашале колку големо е срцето на жирафите? Апсолутно сум одушевена од мојот голем подарок за Денот на вљубените“, напиша таа покрај фотографијата на која во рацете држи огромно срце извадено од телото на убиената жирафа.
На коментарите од налутените активисти за заштита на животните, оваа жена одговори дека „ловот помага во зачувување на дивите животни во Јужна Африка, создава нови работни места и придонесува за развој на туристичката индустрија“.
Таа вели дека смртта на 17-годишниот мажјак ќе создаде прилика „нов мажјак да го преземе стадото што ќе овозможи нова силна генетика“.
Раскажа дека со сопругот отпрвин планирала Денот на вљубените да го мине во некој ресорт, но ги промениле плановите по што изразила желба да оди во лов на жирафа. За тоа „уживање“ сопругот платил 1.500 фунти.
„Со години чекав на мојот совршен мажјак, колку е постар толку кожата му е потемна. Ја обожавам кожата од жирафа и фактот дека е култно животно во Африка“, вели таа.
Додава дека нејзиниот лов тој ден овозможил работа за 11 луѓе и обезбедил месо за локалните жители. Според нејзиното мислење, со забраната за лов на диви животни „тие би станале без вредност и би изумреле“.
Со неа не се сложуваат активистите од организацијата Born Free за борба против трофеен лов на диви животни. Тие го отфрлаат тврдењето дека со тоа се поддржува зачувувањето на животните и локалната заедница.
„Ловот на трофеи е враќање во колонијалното минато, а таргетирањето на одредени животни ја нарушува заедницата на животните и има негативен ефект на нивната популација и целиот екосистем“, порачуваат тие.