Во поголемиот дел од годината жителите на „највисокото“ село во Европа немаат контакт со остатокот од светот.
Помеѓу 2.060 и 2.200 метри надморска височина, на планината Шара во Грузија, во регионот Сванети, се наоѓа „највисокото“ населено место на Стариот континент.
Ушгули е всушност заедница на 4 помали селца: Жибиани, Чвибиани, Чажаши и Муркмели, а во нив живеат околу 70 семејства, односно околу 200 жители.
Единствен пат по кој може да се стигне до ова село е патот кој води кон градот Лентихи, а тој често не е достапен. За време на летото е, па до највисокото село во Европа може да се стигне со автомобил, но зиме најчесто тоа е невозможно. Снегот шест месеци во годината ја покрива целата област.
Меѓутоа, на жителите на ова село тоа не им смета. Тие се навикнати на условите во кои живеат. Нивните деца одат во локалното училиште, а ги имаат и сите неопходни установи за функционирање на селото.
Жителите на четирите селца важат за исклучително гостољубиви кон домашните посетители и странските туристи.
Посебна атракција на ова место е капелата од XII век, изградена за време на кралицата Тамар, а покрај неа на листата на светско наследство заштитени од УНЕСКО се наоѓаат уште неколку градби, од кои најкарактеристични се одбранбените кули во Сванети, предел богат со историја.
Интересно е и тоа што во ова село во 1930 година бил снимен немиот советски документарен филм „Соль Сванетии“, кој е еден од првите етнографски филмови во светот. Режијата е на еден од најпознатите грузиски и советски режисери, Михаил Калатозов.