Легендарниот шведски напаѓач Златан Ибрахимовиќ одлучи да стави крај на својата професионална фудбалска кариера, иако претходно немаше некоја поголема најава.
По натпреварот на Милан против Верона во последното коло од Серија А пред полниот „Џузепе Меаца“, Ибрахимовиќ најави дека ќе ги закачи копачките.
Швеѓанецот доби огромен аплауз од трибините и емоциите го совладаа, па заплака.
За легендарниот шведски репрезентативец немаше збогување какво што посакуваше, она на теренот. Причината е тешката повреда која му овозможи да одигра само 4 натпревари, но на нив постигна и еден гол со што и официјално стана најстариот стрелец во историјата на Серија А.
Својата одлука Ибрахимовиќ ја соопшти на теренот, предизвикувајќи шок и солзи на целиот стадион. Плачеа навивачите, дури и најжестоките од јужната трибина на „Меаца“, но и неговите соиграчи. Се знаеше дека заминува од Милан, затоа и с беше подготвено за прсотување со него, но никој не знаеше дека и заминува во пензија.
Додека навивачите беа во солзи, но и самиот Златан, снимката од играчот од средниот ред на Милан, Сандро Тонали, кој не може да здивне, го обиколија светот.
„Дојде моментот да се збогувам со фудбалот, а не со вас. Не дишам, но добро е. Толку многу емоции на овој стадион. Кога прв пат пристигнав во Милан, ме направивте среќен. Кога дојдов по вторпат ми дадовте љубов“, им порача Златан на навивачите на „Росонерите“ во емотивното обраќање.
По неговиот говор, Ибрахимовиќ се прошета низ стадионот чиј надимак е „Сан Сиро“, застана пред трибината со ултрасите и скокаше на скандирањата: „Кој не скока, тој е Нераѕуро!“.
Ибра играше за Милан во два наврата вкупно пет и пол години, одигра 169 натпревари со 93 постигнати голови и освои две Скудета и еден Суперкупот на Италија. Би можел да остане во Милан на друга позиција, но сѐ уште нема информации за такво нешто.
