Психолозите препознаа нов тип нарцизам.
Нарцисоидните личности се широко проучувани во психологијата. Имаат совршена платформа во културата која е опседната со славните личности и социјалните мрежи. Но, зад препознатливиот тип нарцис се крие помалку познат и поопасен подвид, пишува Guardian.
Прикриениот нарцис е како волк во овча кожа. Прикриените или „ранливите“ нарциси имаат тенденција да бидат поинтровертни од грандиозните нарциси, смета психотерапевтот Лорна Слејд.
„Но, ги делат истите класични особини. Само се манифестираат на многу посуптилно, секојдневно ниво. Но, носат маски, а другите луѓе за нив ќе кажат дека се прекрасни“, додава таа.
Прикриениот нарцизам е тешко да се забележи. Кај прикриените нарциси, нивниот фокус на задоволување на личните потреби е маскиран со посуптилни техники на манипулација и контрола.
Можат да делуваат како слатки и невини, па дури и срамежливи и интровертни, а исто така и многу грижливи и љубезни. Тие можат да бидат рамо за плачење, но ќе го искористат тоа што ќе споделите со нив против вас – со цел да манипулираат со вас, да се чувствувате должни и благодарни. Така им даваме восхит и благодарност, со што се „хранат“.
Како што вели психологот Сара Дејвис, прикриениот нарцис може да биде тивок натрапник и тивок заводник. Се претставува како жртва, често оцрнувајќи се себеси и на тој начин барајќи сигурност.
Се препознаваат по пасивната агресија, лошото ислушување на другите луѓе, но исто така брзо се лутат ако нешто не е по нивно. Чувствителни се на секоја критика и немаат емпатија за туѓите проблеми, туку секогаш своите ќе се обидуваат да ги направат „поголеми“.
Прикриениот нарцизам е всушност манипулација преку изигрување жртва. Можеби ќе бидете вовлечени бидејќи ви е жал, па ќе посакате да им помогнете и „спасите“.
Но, ранливиот нарцис и понатаму ќе бара статус и потврда, ќе „гази“ други луѓе и нема да чувствува емпатија, но методите му се повеќе прикриени. Можеби дури и ќе ви зборуваат колку се интровертни и чувствителни, бидејќи сакаат да делуваат тивко, паметно но сепак ранливо.
„Ако имате чувство дека некоја личност на кој било начин може да биде штетна за вас, верувајте му на инстинктот“, порачува Лорна Слејд.
