Ако досега не сте слушнале за Остин Расел, тоа е сосема разбирливо.
Досега беше „само“ еден многу млад извршен директор во малку познат дел од автомобилската индустрија, водејќи го стартапот за автономни автомобили Luminar.
Меѓутоа, Luminar Technologies Inc., компанија за ласер технологија што Расел ја основа кога имаше само 17 години, кон крајот на минатата недела соопшти дека за првпат е наведена во индексот Nasdaq.
Така, Расел стана првиот самореализиран милијардер, а Forbes исто така објави дека тој е еден од првите милијардери што излегле од светот на автономните возила.
„Сè уште сум релативно млад, но... во ова се вложени многу крв, пот и солзи. Имав среќа што можев да задржам доволно солиден дел“, рече тој во видеоинтервју за Forbes од неговата канцеларија во Пало Алто, Калифорнија.
Акциите на Расел, 104,7 милиони на број (што е околу една третина од капиталот на Luminar), вредеа 2,4 милијарди долари пред неколку дена.
Според Forbes, Расел е редок случај на момче генијалец кое знае како да ги искористи своите таленти. Списанието објави дека тој на само две години веќе го знаел целиот Периоден систем на елементите, а во шесто одделение ја претвори својата конзола Nintendo DS во мобилна откако неговите родители му забраниле да го користи неговиот мобилен телефон.
На 13-годишна возраст, тој веќе поднел барање за неговиот прв патент - подземен систем за рециклирање вода што ја собира водата од прскалките и ја заштедува за следното наводнување, за да се намалат отпадните води. Наместо да оди во средно училиште, тој ги помина своите тинејџерски години во Beckman Laser Institute при Универзитетот во Калифорнија.
Компанијата на Расел особено се фокусира на системите LiDAR (Light Detection and Ranging) кои Apple ги користи и за својот iPhone 12 Pro/Pro Max за подобрено AR играње, меѓу другото.
Forbes истакнува дека Расел е толку сконцентриран на работата што засега ги нема оние работи што им го одвлекуваат вниманието на другите 25-годишници – нема ниту Facebook, ниту Twitter.
Инаку, Кајли Џенер, која ја капитализираше својата популарност на социјалните мрежи, беше „најмладиот самореализиран милијардер“ до неодамна, но Forbes ѝ ја одзеде таа титула откако беше утврдено дека користела „мрежа на лаги“.
