Македонскиот репрезентативец и капитен на „Модрите“ потпиша нов петгодишен договор со хрватскиот гигант.
Аријан Адеми и овој преоден рок не го напушти загрепски Динамо. Имаше шпекулации кои го поврзуваа со шпански Бетис, а потоа беше и пред трансфер во Ал Наср од Обединетите Арапски Емирати, но одлучи дека тоа не му е предизвик.
„Зборував дека ќе си одам, но во еден момент увидов дека тоа сепак не е правиот пат за мене и дека тоа не е она го сакам во животот. Се премислив“, почнува Адеми.
„Ќе останам тука до крајот на кариерата, освен ако не стигне некоја понуда од клуб кој игра во големата петорка. Овде направив сѐ, играв за Динамо, играв во Лигата на шампионите. Сепак, имам и други цели. Сакам да бидам најтрофејниот играч во историјата на Динамо, да бидам оној со најмногу европски настапи... исто така, сакам повторно да играм во Лигата на шампионите со Динамо, да пројдам во осмина-финалето“. Оваа сезона неговиот тим беше многу блиску до историски пласман во осминафиналето, но на крајот по одлучувачкото последно коло сепак извиси.
По повод продолжувањето на верноста управата на клубот одлучи да пушти во промет посебни limited edition дресови од својот капитен. На ракавот на неговиот дрес стои неговата силуета.
„Среќен сум поради ова. И јас ќе си го купам дресот... ќе видиме како ќе оди продажбата на тие 199 limited edition дресови“, заврши Аријан кој со репрезентацијата на Македонија има шанси и да игра на ЕУРО 2020 доколку ги мине претстојните бараж натпревари.