Скопје, 28 јануари 2020 (МИА) – Две лица, од кои едниот администратор, а другиот креатор на групата „Јавна соба“ на социјалната мрежа Телеграм, вчера биле повикани во полициска станица.
Ова денеска го објави дополнителната заменичка-министерка Славјанка Петровска на својот Фејсбук профил.
Истрагата на Бирото за јавна безбедност за групата „Јавна соба“, во која над 7.000 членови меѓусебно си споделувале фотографии со експлицитна содржина, некои преземени од Интернет, а некои од приватни конверзации, меѓу нив и од малолетни девојчиња на возраст од 12-13 години, продолжува.
Петровска нагласи дека по извршените разговори и прибавените докази против нив ќе биде поднесена кривична пријава и додаде дека продолжува со активности за евентуална вмешаност и на други лица.
Министерот за внатрешни работи Наќе Чулев, пак, изјави дека поднесено е барање до компанијата „Телеграм“ со седиште во Лондон да се идентификуваат двајца администратори и двајца модератори на групата „Јавна соба“, а истовремено се прават криминалистички контроли на терен.
Полицијата спроведува криминалистичка контрола на терен и дадени се насоки до инспектори во сите СВР за на терен да се собираат информации за идентификување на лицата кои биле модератори и администратори на групата, но и за сите учесници во групата кои го прекршиле законот „за производство и дистрибуција на детска порнографија“ и „злоупотреба на лични податоци“.