Џони Деп ќе замине во гроб како некој кого јавноста го смета за насилник, беше речено на вчерашното американско судење вредно повеќе милиони долари, покренато поради тужба за клевета што актерот ја поднесе против неговата поранешна сопруга Амбер Херд.
Неговите адвокати ја обвинија Херд дека се подготвува да ја одигра „најдобрата претстава во животот“ додека започнува вториот круг од нивната правна војна во Ферфакс, Вирџинија.
Ѕвездата на „Pirates of the Carribean“ ја тужи актерката поради текстот што таа го напиша за The Washington Post во 2018 година. Иако Херд не го именуваше Деп, таа се опиша себеси како жртва на „сексуално насилство“.
Адвокатите на Деп изјавија дека нејзините тврдења за злоупотреба се лажни и дека му ја уништиле кариерата, како и дека биле дизајнирани да ја поттикнат нејзината кариера.
Иднината на актерот е загрозена откако тој веќе ја загуби тужбата против The Sun во 2020 година, кога судијата на Високиот суд пресуди дека британските медиуми имаат право да го опишат како „женотепач“.
Камил Васкез, која го застапува Деп, пред поротата рече: „Господин Деп ќе замине во гроб знаејќи дека што и да направи, секогаш ќе има луѓе кои веруваат дека си ја злоставувал жената“.
Таа за неговата поранешна сопруга рече: „Таа ја живее и дише оваа лага со години. Таа се подготвува да ја одигра најдобрата претстава во животот на ова судење".
Деп ја тужи Херд за 50 милиони долари, а таа возврати со друга тужба за 100 милиони долари поради тврдењата на неговиот адвокат за неа.
Васкез тврдеше дека пријателите на Деп го виделе „вистинското лице на госпоѓица Херд“, но во исто време нејзините адвокати го обвинија за „вербална, емоционална, физичка и сексуална злоупотреба“ предизвикана од дрога и алкохол.
Елејн Бредехофт, која ја застапува актерката, пред поротата рече дека Деп, иако е „харизматичен и шармантен“, станува „чудовиште кога пие“.