На регионалниот аеродром „Монтгомери“ во американската сојузна држава Алабама во саботата се случила трагична несреќа кога загинал вработен во аеродромот.
Националниот одбор за безбедност при транспорт (НТСБ) соопшти дека Embraer 170, управуван од регионалниот превозник Envoy Air, „беше паркиран на портата со затегната рачна сопирачка кога моторот проголта член на персоналот за поддршка на земја“. Трагичниот настан се случил околу 15 часот по локално време на 31 декември.
Летот 3408, кој требало да полета од Монтгомери за Далас-Форт, бил откажан, а аеродромот привремено затворен за сообраќај.
„Со тага слушнавме за трагичната загуба на член на тимот на AA/Piedmont Airlines“, рече Вејд А. Дејвис, извршен директор на аеродромот „Монтгомери“.
American Airlines во соопштение објави „уништени сме од несреќата во која учествуваше член на тимот“, додавајќи: „Нашите мисли и молитви се со семејството и членовите на нашиот локален тим. Фокусирани сме на тоа да се погрижиме сите вклучени да имаат поддршка која им е потребна во ова тешко време“.
Жртвата не е именувана, а неофицијални извори велат дека станува збор за носач на багаж. Федералната управа за авијација (ФАА) и Националниот одбор за безбедност при транспорт (НТСБ) продолжуваат со истрагата за смртта. За две до три недели се очекува прелиминарен извештај од НТСБ.