Во петтиот натпревар од финалето на плеј-офот на Источната конференција од НХЛ, актуелниот шампион Тампа Беј Лајтнинг го совлада Њујорк Реjнџерс со 3:1 и поведе со 3:2 во серијата до четири победи.
Тампа ќе ја има првата меч топка за влез во големото финале на 11 јуни на мразот на својата „Амели Арена“, а евентуалната седма би се играла повторно во Њујорк.
Победникот на Истокот во големото финале ќе игра против Колорадо Аваланш кој го елиминира Едмонтон Ојлерс со високи 4:0 во партии.
Рејнџерс ја отворија финалната серија со две победи во исконската „Медисон Сквер Гарден“ арена (6:2, 3:2), но Тампа возврати со три победи (3:2, 4:1, 3:1) и го сврте резултатот во нивна полза.
„Сѐ уште не сме ја добиле серијата, само водиме со 3:2. Ќе се обидеме да останеме фокусирани“, изјави тренерот на Тампа, Џон Купер.
По првата третина без голови, домаќинот поведе во 31. минута со голот на Рајан Линдгрен, но седум минути подоцна израмни Михаил Сергачјов.
Мирисаше на продолжение, кога Ондреј Палат постигна гол за водство на Тампа на две минути пред крајот, а Брендон Хејгел ги постави конечните 3:1 на 59 секунди пред крајот. Одличен беше и голманот на Тампа, Андреј Василевски, кој сопре 24 удари на домашните хокеари.
„Бевме трпеливи. Знаевме дека ќе биде вистински предизвик во оваа арена. Продолживме со нашиот план за игра и бевме наградени“, додаде капитенот на Тампа, Канаѓанецот со македонско потекло, Стивен Стамкос.
Њујорк Рејнџерс со овој пораз ја прекина серијата од осум последователни победи на домашен терен.
„Овој пораз дефинитивно боли. Загубивме тесно, играта можеше да се сврти во наша корист. Мислам дека тоа го прави уште пофрустрирачки“, рече дефанзивецот на Рејнџерс, Џејкоб Труба.