Отсекогаш сме знаеле за општата штетност од алкохолот, но добро е кога има и конкретни студии.
Внесувањето на алкохол во организмот доведува до формирање на штетна хемикалија која може трајно да ја оштети ДНК на матичните клетки, а тоа го зголемува ризикот од развој на рак, открија британските научници.
Експертите од целиот свет веќе подолго време предупредуваат на сознанието дека консумирањето големи количини алкохол придонесува за појава на дури седум видови тумори (уста, грклан, грло, хранопроводник, дојка, црн дроб и дебело црево).
„Одредени видови на рак се развиваат поради оштетување на ДНК во матичните клетки. Иако некои од нив настануваат сосема случајно, резултатите од нашата студија упатуваат на сознанието дека внесувањето на големи количини алкохол го зголемува ризикот од овие видови оштетувања“, вели еден од авторите на студијата, професор по молекуларна биологија на Лондонската лабораторија за молекуларна биологија и медицински истражувања, д-р Кетан Пател.
Британските научници ја спровеле студијата на глувци. За да откријат каква штета може да предизвика на телото ацеталдехидот, штетна супстанција произведена при разградувањето на алкохолот во телото, користеле анализа на хромозомите и секвенционирање на ДНК.
Во текот на експериментот, на глувците им беше даден разреден алкохол, а потоа беше проценето влијанието на алкохолот врз ДНК на овие животни.
„Тие открија дека ацеталдехидот се распаѓа и ја оштетува ДНК во матичните клетки на крвта, што доведува до нарушување на хромозомите и трајно ја менува структурата на ДНК во тие клетки“, соопшти британскиот Центар за истражување на ракот, кој помогна во кофинансирањето на студијата.
Оштетувањето на ДНК резултира со смрт на клетките, а во исто време предизвикува природна реакција на телото на закрепнување. Меѓутоа, ако ДНК не успеа да се поправи правилно, тогаш се развива рак. Оштетувањето на матичните клетки влијае на развојот на ракот, тврдат научниците.
Резултатите од предметната студија овозможуваат детален увид во начините на кои алкохолот може да го зголеми ризикот од развој на споменатите седум видови тумори.
Истражувачката агенција на Светската здравствена организација (СЗО) го класифицирала алкохолот во првата група канцерогени состојки, повикувајќи се на „убедливи докази“ кои докажале како алкохолот влијае на развојот на ракот во човечкото тело.
Резултатите од оваа студија на британските научници беа објавени во стручното списание Nature.
Продолжете да читате: Пиењето алкохол нема здравствени придобивки за луѓето помлади од 40 години