Во Венеција започнува 80-тиот Меѓународен филмски фестивал, а меѓу првите во овој романтичен град пристигнаа актерот Џорџ Клуни и неговата сопруга Амал Клуни.
Парот одлично расположен се прошета низ Венеција држејќи се за рака, а убавата адвокатка привлече внимание со својот аутфит.
Амал носеше бел мини фустан со цветен дезен. Фустан со едноставен крој, без ракави, со тркалезно деколте, украсен со црни цветови.
Фустанот го спои со елегантни потпетици од модната куќа Roger Vivier. Црните обувки се изработени од мрежест материјал, имаат тенка, висока 6 и пол сантиметри, лакирана потпетица и лакирана декорација на предната страна.
Сопружниците Амал и Џорџ Клуни традиционално голем дел од летото го поминуваа со своите деца во прекрасна вила на езерото Комо. Порано служеше како место за средба на пријателите на актерот, а денес е дом на неговото семејство, каде традиционално се домаќини на членовите на семејството на Амал и други пријатели со деца.
Во Венеција ќе ја прослават десетгодишнината од врската, а на 27 септември деветгодишнината од бракот во кој ги добија шестгодишните близнаци Ела и Александер. Двојката се венчаше во Венеција, а медиумите ја прогласија нивната венчавка за свадба на годината.
Инаку, филмскиот фестивал ќе трае до 9 септември, а поради штрајкот на сценаристите и актерите, се очекува годинава на црвениот тепих да прошетаат помал број холивудски ѕвезди од вообичаено.