Поранешниот селектор на македонската фудбалска репрезентација, Игор Ангеловски, е во потесниот круг кандидати за нов тренер на хрватскиот прволигаш Хајдук, јавија денеска локалните медиуми.
Ангеловски (45), според весникот Slobodna Dalmacija со својата возраст и ентузијазам се вклопува во плановите на раководството на сплитскиот клуб за нов шеф на стручниот штаб, кој треба да го наследи Швеѓанецот Јенс Густафсон, кому денеска му беше врачен отказ.
Ангеловски е без ангажман од завршувањето на ЕУРО2020 на кое за прв пат во историјата ја одведе македонската репрезентација.
Хајдук е еден од големата југословенска четворка со 9 титули шампион на Југославија и исто толку купови Маршал Тито. По осамостојувањето на Хрватска освои 6 титули во лигата, но последната во 2005 година. Има и исто толку хрватски купови, а последната титула му е од 2013 година.
Сезонава за Хајдук настапува само еден македонски фудбалер и тоа повремениот репрезентативец Јани Атанасов.
Ангеловски пет и пол години ја водеше Македонија, а претходно во клупскиот фудбал има само две и пол сезони во Работнички.
