Вистинска драма се одвиваше денеска во Собранието при собраниската седница за гласање доверба на Владата.
Пратеникот Кастриот Реџепи од Беса на социјалните мрежи откри дека одлучил да не се појави на денешното гласање недоверба бидејќи добил информација дека во декември голема е шансата државата да добие датум за преговори за ЕУ.
Тој не се појави во Собранието при што се отворија многу шпекулации, меѓу кои и дека е киднапиран.
„Се отвораат многу шпекулации за непојавувањето на пратеникот на Беса, Кастриот Реџепи во Парламентот и ниту претседателот, ниту премиерот немаат став околу тоа каде се наоѓа, изјави попладнево претседателот на ВМРО-ДПМНЕ, Христјан Мицкоски пред Собранието по прекинувањето на собраниската седница за гласање доверба на Владата“.
Конечно, пo шпекулациите за негово наводно исчезнување и киднапирање, пратеникот од Беса, Кастриот Реџепи се огласи со видеопорака до јавноста преку неговиот Facebook профил.
„Сакам да ви се заблагодарам за поддршката. Сигурноста и стабилноста на земјава, мирот и благосостојбата на нашиот народ, дефинитивно треба да биде најважната работа за сите. Претседателот Биљал Касами и другите не треба да се загрижени за мене. Јас сум на сигурно место, на вистинската страна сум, со Албанците сум, и со сите граѓани на земјава кои сакаат мир, слобода и демократија“, вели Реџепи во пораката на Facebook.
Набргу по неговата објава, пратеникот Димитар Апасиев од Левица се огласи на Facebook.
„Со репетиран калаш на слепоочница се пишуваат најубавите евро-атлантски пратенички статуси“, стои во неговата објава.
