Предводникот на Арсенал смета дека сѐ уште е рано да го споредуваат со Пеп Гуардиола кој има постигнато премногу во однос на него.
Микел Артета ги отфрли тврдењата дека тој и Френк Лампард можат да бидат наредните Жузеп Гуардиола и Јирген Клоп. Токму Артета и Лампард в сабота ќе се сретнат во финалето од ФА Купот надевајќи се дека ќе дојдат до првиот трофеј во своите тренерски кариери.
„И двајцата сме млади, двајцата се трудиме да си го пронајдеме вистинското место, така да не би сакал да ме споредуваат со Пеп, ниту пак со Клоп“, вели Артета.
Потоа се осврна и на својот противник со кого утре од 18:30 часот на „Вембли“ го чека важна пресметка.
„Френк како играч беше класа. Мислам дека тоа што можеше да игра на врвно ниво долг период и тоа на така важна позиција во голем клуб покажува колку само беше неверојатен. Како тренер, после Дерби Каунти покажа дека е амбициозен и го поседува оној прав начин за охрабрување на играчите“.
Како играч Артета двапати го освои ФА Купот, исто така со Арсенал. Триумф утре ќе биде значаен чекор напред во неговата кариера.
„Освојувањето титули го разработува моторот на тимот. Генерира моменти кога заеднички правите нешто кое буди емоции. Ги зближува сите, создавате спомени, има многу работи во освојувањето трофеј кои се толку многу позитивни за тимот, а кога се наоѓате среде процес на создавање на тимот дури и е премногу важен настан. Пред нас е огромна шанса, па ајде да ја искористиме“, завршува баскискиот стратег.
