Авиокомпанијата Emirates на патниците кои на нејзин лет ќе се заразат со COVID-19 им нуди бесплатно осигурување, кое вклучува покривање на трошоците за лекување, карантин и во најлош случај, погреб.
Од компанијата наведуваат дека понудата, која важи за период од 31 ден, сметајќи од почетокот на патувањето, ќе биде достапна веднаш и ќе трае до крајот на октомври.
Осигурувањето е бесплатно за сите патници, без разлика на патничката класа или дестинацијата, и се применува автоматски, без дополнителна потреба за регистрација.
Превозникот со седиште во Дубаи соопшти дека за осигурување на медицинските трошоци ќе обезбеди до 150.000 евра. Ќе ги плаќа и трошоците за карантин во хотелите во период од две недели, по 100 евра дневно. Во случај на смрт на патник од коронавирис, компанијата ќе обезбеди по 1.500 евра за погребални трошоци.
– Знаеме дека луѓето копнеат по авионските патувања, бидејќи границите во светот постепено се отвораат, но флексибилноста и гаранциите се потребни за непредвидени ситуации и настани за време на патувањето, изјави претседателот на групацијата Emirates, Ахмед бин Саид Ал Мактум.
Акцијата на Emirates доаѓа во период кога авиокомпаниите низ светот се тешко погодени од епидемиолошките мерки во борбата против пандемијата на коронавирусот.