Иако беше најавено дека Томас Тухел ќе остане тренер на Баерн до крајот на сезоната, баварскиот клуб размислува за привремени алтернативи, а едно име е апсолутно изненадувачко.
Според угледниот новинар на германски Sky Sport, Флориан Плетенберг, Баерн размислува за Оле Гунар Солскјер* како потенцијално привремено решение.
(*Всушност правилниот норвешки изговор е Уле Гунар Сулшер.)
На поранешниот менаџер на Манчестер Јунајтед моментално му истекува договорот и е подготвен да започне нов проект, а спортскиот директор на Баерн, Кристоф Фројнд, наводно со години го следи норвешкиот стручњак.
Сепак, големо прашање е како би реагирале навивачите на Баерн на евентуалното доаѓање на Солскјер, бидејќи ова е човекот кој на Баварците им го нанесе најболниот пораз во историјата.
Секако, станува збор за епското финале на Лигата на шампионите во 1999 година кога Баерн до крајот водеше против Манчестер Јунајтед со 1:0, а потоа „Црвените ѓаволи“ направија пресврт со головите на Теди Шерингам во 90+1 и Оле Гунар Солскјер во 90+3.
Солскјер е без клуб откако доби отказ од „Олд Трафорд“ во 2021 година и моментално е вработен како технички набљудувач на УЕФА, што подразбира присуство на натпреварите од Лигата на шампионите и давање извештаи.