Американскиот претседател Џо Бајден синоќа оцени дека Илон Маск ја купил платформата за социјални медиуми Twitter за да шири лаги низ светот.
Twitter вчера отпушти половина од персоналот, но соопшти дека скусувањата се помали во тимот одговорен за спречување на ширење на дезинформации. Ова доаѓа откако огласувачите се повлекоа поради загриженоста за управувањето со содржината.
– Сега, она што најмногу нè загрижува е тоа што Илон Маск купува компанија која испраќа, или едноставно шири, лаги низ целиот свет… Во Америка веќе нема уредници. Нема. Како очекуваме децата да разберат што е „на коцка“?, рече Бајден на настан за собирање средства.
Портпаролката на Белата куќа, Карин Жан-Пјер, претходно изјави пред новинарите дека Бајден бил многу јасен за потребата да се намали говорот на омраза и дезинформациите.
– Овие негови ставови се однесуваат на Twitter, важат за Facebook и секоја друга социјална мрежа каде што корисниците можат да шират дезинформации, рече портпаролката.
Маск вети дека ќе ја врати слободата на говорот и во исто време ќе спречи Twitter да стане „пеколен пејзаж“. Сепак, големите огласувачи изразија загриженост поради купувањето на Twitter од страна на мултимилијардерот.
