Поранешниот претседател на САД Барак Обама и првата дама Мишел Обама присуствуваа на откривањето на нивните официјални портрети што ќе бидат изложени во Националната галерија на музејот Смитсонијан во Вашингтон.
Обама рече дека неговиот портрет, што го изработи Кехинде Вајли, е „прилично прецизен“.
Госпоѓа Обама беше одушевена од нејзиниот портрет, дело на Ејми Шералд, која исто како Вајли е афро-американски уметник.
Меѓу гостите на свеченото откривање беа режисерот Стивен Спилберг и актерот Том Хенкс.
„Никој моето семејство досега не позирал за портрет“, рече Обама.
Тој се пошегува дека фотографирањето за школски алманах било најблиску до тоа досега во неговиот живот.
Обама ја пофали Шералд бидејќи доловила колку е „згодна“ неговата сопруга и повторно се пошегува дека Вајли „ја немал предноста да работи со толку убав модел“.
Портретите, секако, не поминаа без измешани коментари од јавноста. Некои од корисниците на социјалните мрежи се изјаснија позитивно, коментирајќи дека поранешниот претседател и првата дама изгледаат „моќно“, додека други се шегуваа дека позадината на портретот на Барак Обама потсетува на фотографија на Бијонсе и на серијата „Симпсонови“, а некои дека госпоѓа Обама „не личи на себе“ на портретот.
