Одбранбениот играч на Интер вели дека најтежок човек за чување во таборот на лутиот градски ривал Милан е Рафаел Леау.
Младиот Алесандро Бастони имаше интервју со DAZN каде говореше за претстојното Дерби дела Мадонина кое е закажано за в сабота од 18 часот на стадионот „Џузепе Меаца“.
„Сѐ може да се случи во овие натпревари. Сѐ уште сме рано во сезоната. Пред една година на денешен ден не бевме лидери на табелата, но и покрај тоа ја освоивме титулата. Она што е најважно е да се избегнуваат порази“, вели Бастони.
„Тео е најбрз, додека Леау е најкомплициран играч кој ќе треба да го чувам“, открива 22-годишниот Бастони.
На прашањето дали некогаш би направил забранет трансфер и би го облекол дресот на „Росонерите“, тој кратко одговори: „Не, никогаш. Не постои ниту 0,1% шанса да ме видите таму“.
Бастони откри и интересен податок за неговото семејство.
„Како мал дербијата ги гледав дома на ТВ со татко ми, кој исто така е навивач на Интер. Никогаш немавме кавги дома, иако едниот брат навива за Рома, додека другиот мрази фудбал и никогаш нема дојдено да ме гледа на стадион“.
