Најголемото дерби во НБА беше достојно за титулата. Во Бостон синоќа се одигра драма на ниво на легендарен двобој меѓу култните Селтикс и Лејкерс.
Откако домаќините водеа со 18 разлика, гостите славеа со 129:128, со кош постигнат со звукот на сирената, дело на една од најголемите легенди на Селтикс – Раџон Рондо.
Дуелот беше полн со неизвесност, а победникот го реши токму поранешната легенда на Бостон Селтикс.
На 10 секунди пред крајот, Селтикс имаа предност од 128:127. Лејкерс тргнаа во напад за победа и иако сите очекуваа додавање за Леброн Џејмс, одговорноста ја презеде Инграм кого домашните кошаркари го изблокираа и топката се одби токму во рацете на поранешниот играч на Селтикс, Раџон Рондо, кој погоди за победа на гостинската екипа.
Леброн Џејмс на оваа средба стана третиот играч на Лејкерс кој рпотив најголемиот ривал остварил трипл-дабл во двобој во регуларната сезона (28 поени, по 12 скокови и асистенции).
Кај Бостон најефикасен беше Ирвинг со 24 поени.
Ова е 28-ма победа за Лејкерс сезонава и може да биде од клучно значење, со оглед на тоа дека водат голема битка со Сакраменто Кингс и Лос Анџелес Клиперс за пласман во плејоф.
Во останатите натпревари, Индијана беше подобра од Л.А. Клиперс со 116:92, а Орландо ја победи Минесота со 122:112. Торонто како гости ги поразија Атланта со 119:101, а Оклахома на свој терен го порази Мемфис со 117:95.
