Цените на нафтата се задржаа на меѓународните пазари блиску до нивото од 84 долари во очекување на раст на каматните стапки во САД и во еврозоната, а на нив натежнаа и навестувањата за стабилна понуда од Русија.
На лондонскиот пазар цената на барелот со датуми на испорака во март беше за 58 центи пониска од вчерашното затворање и изнесуваше 84,32 долари. Поактивно се тргуваше со барели со датум на испорака во април, чија цена беше повисока за 24 центи и изнесуваше 84,74 долари. На американскиот пазар цената на барелот се зголеми за 22 центи, на 78,12 долари.
Во фокусот на пазарот оваа недела се состаноците на централната банка на САД и Европската централна банка (ЕЦБ), кои треба повторно да ги зголемат каматните стапки за да го запрат силниот раст на потрошувачките цени.
Инвеститорите очекуваат ФЕД да ги зголеми каматните стапки за четвртина в среда, на крајот на дводневната сесија, а ЕЦБ за половина процентен поен в четврток.
Пазарите стравуваат дека заострувањето на монетарната политика уште повеќе ќе го забави економскиот раст, што би значело и послаба побарувачка за енергетски производи.
