Фудбалската федерација на Италија (ФИГЦ) ја потврди информацијата дека во иднина производител на спортска опрема за репрезентацијата ќе биде Adidas, што значи дека препознатливите дресови на Puma се минато.
Претседателот на ФИГЦ, Габриеле Гравина, вели дека е горд на соработката со Adidas.
„Објавата за нашето партнерство е гордост на ФИГЦ. Оваа соработка е важен чекор во однос на зголемувањето на нашата комерцијална атрактивност, а исто така го зајакнавме процесот на развој на нашиот бренд, како во Италија така и во странство. Страста и ентузијазмот што ги забележавме од Adidas се во еднаква мера како и во нашата федерација, а во контекст на напредокот на сите репрезентации и фудбалот во Италија“, изјави Гравина.
Извршниот директор на Adidas, Каспер Рорстед, вели дека е горд и на споменатата соработка.
„Неверојатно сме горди што можеме да го објавиме ова долгорочно партнерство. Воодушевени сме што еден од најуспешните тимови во светот станува дел од нашиот тим. Со нетрпение очекуваме да постигнеме големи работи“, рече Рорстед.
Puma е партнер на италијанската репрезентација веќе 20 години, а носејќи ја опремата на овој спонзор станаа светски шампиони во 2006 година и победници на Европското првенство минатата година. Овие дресови често беа тема на јавноста бидејќи беа едни од најубавите и најпривлечните меѓу репрезентациите.
