Претседателот на УЕФА повторно упати остри критики кон проектот за Суперлигата чиј живот лани траеше многу кратко време.
„Никој не ја сака Суперлига, освен оние кои мислат дека фудбалот е само пари“, вака Александер Чеферин ја објасни потребата за Суперлигата говорејќи во интервју за францускиот неделник Le Journal du Dimanche.
„Кога во 2019 година се разговараше за новиот формат на Лигата на шампионите, почна притисокот. Ни работеа зад грб додека ни подаваа рака, разговараа за тоа веќе три години пред да објават“, вели тој.
„Рачунаа на фактот што 12 клубови се имаа согласено, а други требаше да ги следат. Но, сѐ траеше 48 часа. Се сеќавам дека тоа беа прилично стресни два дена, на телефон бев од утро до мрак“, се присетува тој.
Иако проектот пропадна, три клуба најавија дека не се откажуваат од идејата за таква лига и дека во иднина ќе ја реализираат. Тоа се Јувентус, Барселона и Реал Мадрид.
„Немам проблем со нив. Имаат традиција и ги почитувам, но повеќе не се замарам со нив“.
Триото поднесе тужба поради пропаднатиот проект, но тешко дека ќе го оживеат со оглед на тоа што најважните институции на Стариот континент ја поддржуваат УЕФА кога станува збор за оваа тема.
„И натаму добивам бесмислени тужби. Европскиот суд сѐ уште се нема изјаснето, но сите Влади на земјите од ЕУ нѐ поддржуваат, исто како и Европската комисија, Европскиот парламент и Владата на Обединетото Кралство“.
Чеферин уверува дека вистинските фудбалски вљубеници можат да бидат мирни - барем во наредните десетина години.
„Со сигурност во наредните 10 години нема да има Суперлига, бидејќи никој не ја сака, освен оние кои мислат дека фудбалот е само пари“, завршува тој.