Португалскиот стручњак од денеска повеќе не е тренер на Рома, соопштија од клубот од главниот град на Италија, а како причина за раскинувањето на соработката се наведени лошите резултати во тековнава сезона.
„Волчицата“ моментално е на 9-тото место на табелата во Серија А со само 29 освоени бодови од 20 натпревари, што е нешто што не може да ги задоволи челниците на клубот.
„Во име на сите нам во АС Рома му се заблагодаруваме на Жозе за страста и залагањето од неговото доаѓањето во жолто-црвениот тим. Секогаш ќе ги помниме најубавите спомени од неговата работа, но проценивме дека во најдобар интерес на клубот е итна промена. На Жозе и неговите сореаботници им посакуваме сѐ најдобро во иднина“, е пораката на Ден и Рајан Фридкин, американските газди на Рома.
Клубот сѐ уште не објавил кој би можел да биде наследник на славниот Португалец, но италијанските медиуми најавуваат дека тоа би можело да се случи многу брзо, а за најсериозен кандидат го сметаат Даниеле Де Роси, поранешната легенда на клубот.
Инаку, Мурињо ја презеде Рома во мај 2021 година, а една година подоцна со овој тим ја освои Европа конференциската лига во Тирана, што е прв европски трофеј за овој италијански клуб во историјата. Наредената 2023 година за малку не ја освои Лига Европа откако во финалето во Будимпешта загуби од Вест Хем.
Како што се вели, Португалецот, како еден од најдобрите фудбалски тренери во XXI век, нема да има многу проблеми да најде нова работа, бидејќи за него веќе интерес покажале во Челси, на чија клупа седеше со многу успех.
